သားသား( ၄)

စာမရေးတာကြာပြီး ပြန်ရေးဖို့ ပြင်တော့ သားသားအကြောင်းပဲ ရေးချင်လာတယ်။
ဒီတခါတော့ သားသားရဲ့ ၀ါသနာတချို့ မှတ်တမ်းတင်ထားချင်လို့ပါ။

သူက စွန့်ဦးတီထွင်တော့ဖြစ်မယ်မထင်ဘူး။ ဘာ့ကြောင့်ဆို ငယ်ငယ်က ကစားစရာအသစ်တခု ၀ယ်ပေးရင်တောင် ချက်ချင်းကိုင်မဆော့ဘူး။ သူ့ကိုတယောက်ယောက်က ဆော့ပြရသေးတယ်။ ဘာမှမဖြစ်ဘူး လို့ သူစိတ်ချမှ ကိုင်တတ်တဲ့အမျိုး။ ဒါ့ကြောင့်လဲ သူငယ်ငယ်က အပူလောင်တာ ချော်လဲတာ ဘာညာ သိပ်မရှိဘူး။ ဘယ်အလုပ်မဆို ချက်ချင်း ဇိုးကနဲ ဇတ်ကနဲ မလုပ်ဘူး။

သူ စိတ်ဝင်စားတာက discorvery လိုမျိုး မှတ်တမ်းကားတွေ ၊ နောက် ကမ္ဘာလုံး တွေပဲ။ ငယ်ငယ်တုန်းက ကမ္ဘာလုံးခပ်သေးသေးတွေပဲ ရလို့ အကြီးကြီး ရရင် ၀ယ်ပေးမယ်လို့ ပြောထားခဲ့ဘူးတော့ ထိုင်းကိုရောက်တဲ့အခါ ကမ္ဘာလုံးအကြီးကြီးတွေ တွေ့ရင် ၀ယ်ခိုင်းတတ်တယ်။

ဒါပေမယ့် ခုနည်းနည်းကြီးပြီး ကွန်ပျူတာ ကိုင်တတ်တဲ့အခါမှာတော့ google earth ကိုဒေါင်းလုပ်ဆွဲပေးခိုင်းနေပြီ။ အိမ်ကို နိုင်ငံတကာက ရဲဘော်ဟောင်းတွေ တယောက်ယောက်လာလည်ရင် ဘယ်နိုင်ငံကလဲမေးပြီး သွားရှာတာပဲ။ တခါတလေကျ သူနေခဲ့တဲ့ မြို့ ကို ပြန်သွားရှာကြည့်တတ်သလို ခုနေတဲ့ မြို့ကိုလဲ အသေအချာ လိုက်ကြည့်နေတတ်ပြီ။ သူတက်တဲ့ကျောင်း ၊ မြို့အ၀င်လမ်း ၊ ဆေးရုံ စသဖြင့် တွေ့တဲ့အခါ မိဘတွေကို ခေါ် ခေါ် ပြတာပဲ။ သူကမ္ဘာကြီးက နိုင်ငံတွေ မြို့တွေကို စိတ်ဝင်စားတာကတော့ ခုကတည်းက သားသားဘယ်တော့ အဲဒီနိုင်ငံတွေကို သွားလို့ ရတော့မလဲ လို့ ခဏခဏမေးတာပါပဲ။ အသက် ၁၈ နှစ်ပြည့်ပြီးတဲ့အခါ သားသွားချင်တဲ့ နိုင်ငံတွေကို သွားလို့ရလိမ့်မယ်လို့ ဖြေပေးထားရတယ်။

သားသားရဲ့ ကမ္ဘာလုံးများ

တီဗွီသတင်းက တခုခုဖြစ်တဲ့နိုင်ငံမျိုးတွေကို ကြားရင် ချက်ချင်း ဂူဂဲလ်အတ်ထဲဝင် ရှာတော့တာပေါ့။ ပြီးရင် မေးမဆုံးတော့ဘူး။ လေမုန်တိုင်းတိုက်တာ၊ ရေကြီးတာ၊ နှင်းကျတာ၊ ကမ္ဘာမှာ ကုန်းမြေထက် ရေတွေက များနေတာ ၊ အပင်တွေမှာ ဘယ်လိုအသက်ရှိတာ စသဖြင့် တနေ့တမျိုးမရိုးရအောင် ခုတလော ပြောနေပြန်တာပဲ။ သူက နှင်းတွေကို ကိုင်ကြည့်ချင်သေးသတဲ့။

နောက် အားကစားတခုခု လုပ်လို့ သူရှုံးရင် မခံချင်ဘူး။ ခုတလော ကြက်တောင် ရိုက်လို့ ရှုံးလာရင် မကျေမနပ်နဲ့ ပြန်လာတတ်တယ်၊ ချက်ချင်းတော့ ဘယ်နိုင်ပါ့မလဲ။ အလေ့အကျင့်ဖြစ်အောင်နေ့တိုင်း ကျင့်ရတယ် ဒါမှ သူများတွေကို နိုင်မယ်လို့ ပြောပြရင်း သူ့အဖေက သူ့ကို လေ့ကျင့်ပေးရတယ်။ အဲဒီအခါကျ သူ့အဖေကို ပြောတတ်တာက ပါပါး အဲဒီကောင်တွေနဲ့ တရက်လောက် လိုက်ရိုက်ပါလားတဲ့။

မနက်ပိုင်း ကျောင်းတက်ခါနီး

တလောက မိတ်ဆွေတယောက်က သူ့တူမနဲ့ မင်းကိုပေးစားမယ်လို့ ပြောလို့ ထမင်းစားရင်း သူ့မှာ မျက်ရည်ပေါက်ပေါက်ကျအောင် ငိုလိုက်ရတာ ၊ သူ့အဖေက ငယ်သေးလို့ပါကွာ လို့ ပြောတော့ စိတ်တွေဆိုးလို့၊ သားကို ချစ်လို့စတာ ၊ တကယ်မဟုတ်ဘူး ဒါ့ကြောင့် သူ့ကိုလဲ ပြန်စလိုက် ဘာညာနဲ့ မြှောက်ပေးရသေးတယ်။

မနှစ်တုန်းကသင်္ကြန်မှာ စင်ပေါ်တက် ဟစ်ဟော့ပ် နဲ့ ကသတဲ့၊

ခုတလောတော့ ဒီနှစ်ကျောင်းပိတ်ရက် ကိုရင်ဝတ်ချင်အောင် နားသွင်းနေတုန်းပါပဲလေ။
ချစ်ခင်စွာဖြင့်
ခင်မင်းဇော်