Friday, June 26, 2015

မြင်သလို ပြောမယ်

                                            ဓါတ်ပုံ (ဒီဗွီဘီ)
တချို့တွေက ကြံဖန် ဖာထေးတတ်ကြသေးတယ်။ ၂၀၀၈ ဖွဲ့စည်းပုံအောက်က လွှတ်တော်ထဲမှာ ဝင်ပြီး အဲဒီအခြေခံဥပဒေကို ပြင်မလို့တဲ့။ မဖြစ်နိုင်ပါဘူးလို့ ပြောတဲ့လူတွေကိုတော့ ဂဏန်းသွားတွေတဲ့။ ခု လက်တွေ့မှ သိရပြီဆိုတော့ အချိန်က ၃ နှစ် ကုန်ဆုံးခဲ့ရပြီ။

လွှတ်တော်ထဲက မဲကို ကြည့်ပါဦး ။ အားရစရာကြီးပါတဲ့။ အဲဒါလဲ ခွေးဝမ်းသာအောင် လေလည်ပြတဲ့ အကွက်ဆိုတာ မြင်ကြစေချင်ပါတယ်။ လွှတ်တော်ထဲက တမတ်သား တွေနဲ့ ကြံ့ဖွတ်တွေဟာ အင်မတန် အမိန့်နာခံတတ်ကြတဲ့ စစ်အုပ်စု ဆိုတာ သိထားပြီး စစ်တပ်ရဲ့ သဘောသဘောဝကို သေချာ နားလည်မယ်။ ၂၀၀၈ အခြေခံဥပဒေကို သေချာနားလည်မယ်ဆိုရင် ဒီအကွက်က အင်မတန်ရိုးစင်းပါတယ်။ မထိတထိလေးနဲ့ကြိတ်မနိုင်ခဲမရ ဖြစ်စေပြီး အနိုင်ယူပြလိုက်တာပါ။ ဒီတော့ ဘာများ အားတက်ဖွယ် ဖြစ်ပါလိမ့်။

ရန်သူက အင်မတန်ပြတ်သားပါတယ်။ ချော့လိုက် မြှောက်လိုက်နဲ့ သူတို့လမ်းကို သူတို့ ဆွဲထားတဲ့ လမ်းပြမြေပုံအတိုင်း တချက်မလွဲသွားနေတာပါ။

ဒီလိုပါပဲ။ ပြည်သူက ပြည်သူ့တာဝန်ကျေပါတယ်။ မဲထည့်ဆို ထည့်ပေးကြ။ လက်မှတ်ထိုးဆို ထိုးပေးကြ။ တချို့များဆို လွှတ်တော်ပြင်ပက တိုက်ပွဲတွေနဲ့ပါ အားဖြည့်ပေးခဲ့ကြတာပါ။ သို့သော်လည်း ကိုယ့်လုပ်ရပ်သာ အမှန်။ ငါတို့လျှောက်တဲ့ လွှတ်တော်တွင်းက ဥပဒေပြင်ဆင်ရေးသာ အမှန် ဆိုတဲ့ ငါတကော ကောနေကြတဲ့ နိုင်ငံရေးသမား လို့ ကိုယ့်ဘာသာ ဟန်ဆောင်နေတဲ့ လူတွေကတော့ လွှတ်တော်ထဲမှာတောင် ဒေါက်တာညိုညို သင်းလို ရပ်တည်မပြခဲ့ကြပါဘူး။ လွှတ်တော်ထဲမှာ စကားစစ်ထိုးပွဲတွေ မလုပ်နိုင်ခဲ့ကြပါဘူး။

ဒီသုံးနှစ်အတွင်းမှာ ဒီချုပ်အနေနဲ့ လွှတ်တော်ထဲ ဝင်ပြီး ပြုလုပ်မယ်လို့ ပြောခဲ့တဲ့ အချက် ၃ ချက်စလုံး (အခြေခံဥပဒေပြင်ရေး။ တရားဥပဒေစိုးမိုးရေး၊ ပြည်တွင်းငြိမ်းချမ်းရေး) ခုချိန်ထိတော့ ဘာမှမရခဲ့ပါဘူး။ ၂၀၀၈ကို လက်မခံတဲ့ ကျမအနေနဲ့ ဆိုရင်တော့ ဒီအချက်တွေ မရနိုင်ဖူးဆိုတာ အဲဒီကတည်းက ပြောခဲ့ယုံခဲ့ပါတယ်။

Sunday, June 21, 2015

ရွှေရတုမှတ်တမ်း

အသက်ငါးဆယ် ရွှေရတု ကိုရောက်ခဲ့ပြီ။ ဘဝမှာ လုပ်ခဲ့တာတွေ အတွက်လဲ ဘယ်တော့မှ နောင်တမရသလို ရောက်နေတဲ့ဘဝမှာလဲ ရောင့်ရဲတတ်ခဲ့ပြီ။
အဖိနှိပ်ခံဘက်ကနေ ရပ်တည်နေမယ့် စိတ်ဓါတ်ကလဲ ဘယ်တော့မှ မပြောင်းလဲမယ့် ယုံကြည်ချက်။
ကိုယ်ကျင့်တရား ကို အသက်နဲ့ထပ်တူ ထိန်းသိမ်းခဲ့တာကြောင့်လဲ ဘာခြိမ်းခြောက်မှုကိုမှ ဂရုမစိုက်။
ဘာပိုင်ဆိုင်မှုမှမရှိတော့လဲ ဆုံးရှုံးဖို့ တွေးပူစရာ ဘာမှမရှိ ။ ကျမသည်ကျမသာ ဖြစ်ခဲ့ရသည့်အတွက်လဲ ကျေနပ်နေမိဆဲ။


ဒါပေမယ့်လဲ လန်းဆန်းတဲ့ နှင်းဆီဝါပေါ်က ပိုးကောင်လေးလို အိုခြင်းနာခြင်းအနိစ္စတရားတွေကတော့ ရောက်ရှိလာခဲ့လေပြီ။ သေခြင်းတရားသည် မနေ့ကထက် တရက်နီးခဲ့ပြီ။ အသက်ရှင်နေချိန် လူသားတာဝန်ကျေပွန်ခဲ့ရဲ့လား။ နိုင်ငံသားတာဝန်ကျေပွန်ခဲ့ရဲ့လား။ သမိုင်းပေးတာဝန်ကျေပွန်ခဲ့ရဲ့လား။ ဆန်းစစ်မှုတွေက တော့ ရှိနေပေဦးမည်။

သမီးတယောက်တာဝန် ၊ ဇနီးတယောက်တာဝန်၊ မိခင်တယောက်တာဝန် နိုင်သလောက်ကို ထမ်းနိုင်သမျှ ထမ်းပိုးခဲ့ရပေဦးမည်။ ဒါသည်ပင် လူဖြစ်ရခြင်း၏ သဘောသဘာဝ မဟုတ်တုံလော။
မိတ်ဆွေ.... အသင့်ထံ ကျမ ချစ်ခြင်းတွေ ပေးဝေပါသည်။ ပျော်ရွှင်ခြင်းတွေ ဝေမျှပါသည်။
ရိုးသားစွာ လက်ခံပေးပါလော့။

ချစ်ခင်စွာဖြင့်
ခင်မင်းဇော်

Saturday, May 30, 2015

လွယ်အိတ်တလုံးရဲ့ ဒိုင်ယာရီ

ဒီနေ့ နယူးဇီလန်က ယူ ၂၀ ကမ္ဘာ့ဖလားဘောလုံးပြိုင်ပွဲ နဲ့ ပတ်သက်ပြီး ပြောကြဆိုကြရာက နယူးဇီလန်ရောက် ကဗျာဆရာ စာရေးဆရာ ကိုခင်လွန်းနဲ့ စကားစမြည်ပြောဖြစ်ရာကနေ မြန်မာ နိုင်ငံအလံတွေ အကြောင်းရောက်သွားတယ်။ အဲဒီတော့မှ ကျမ ထောင်ထဲ ရောက်နေချိန် ၁၉၉၁ ခုနှစ်လောက်က ထောင်ထဲမှာ တချောင်းထိုးအပ်နဲ့ ထိုးဖြစ်ခဲ့တဲ့ လွယ်အိတ်ကလေးဆီ စိတ်က ရောက်သွားတယ်။

အဲဒီလွယ်အိတ်ကလေးကို ထိုးခဲ့ချိန်တုန်းက အရောင်စပ်တာ ဒီဇိုင်းဖေါ်တာလေးကို မျှော်လင့် စိတ်ကူးမိတဲ့အတိုင်း လွတ်လွတ်လပ်လပ် စိတ်နဲ့ လုပ်နိုင်ခဲ့တယ်။

ထောင်ဆိုတာ လူကိုသာ ဘယ်မှမသွားနိုင်အောင် ချုပ်ထားနိုင်ပေမယ့် စိတ်ကူးတွေကိုတော့ ချုပ်ထိန်းထားလို့မရတဲ့ နေရာပေါ့။ ဆိုတော့ ကွန့်မြူးချင်ရာ ကွန့်မြူးနိုင်သလို ဖြစ်ချင်ရာတွေကိုလဲ အကန့်အသတ်တွေကြားထဲက လုပ်နိုင်သလောက် လုပ်နိုင်ခဲ့တာပဲ။
အဲဒီလွယ်အိတ်ကလေးကို ဒီတခေါက် ကိုအံ့ကျော် ပုသိမ်ပြန်တော့ ကျမရဲ့ ဘီဒိုထဲကနေ ရှာဖွေတွေ့ရှိပြီး တအံ့တသြနဲ့ သယ်ချလာခဲ့တယ်။

သူ့ကို ပြောလဲ မပြဖြစ်ခဲ့တဲ့ အဲဒီလွယ်အိတ်ကလေး အကြောင်းကို သူအိမ်ကို ပြန်ရောက်လာတော့ မေးမြန်းပြီး အဓိပ္ပါယ် ဖေါ်ခိုင်းနေသေးတယ်။
ကျမ ထိုးထားတဲ့ သင်္ကေတတွေကို သူမမြင်မိလိုက်ဖူးတဲ့။

                               ကျမရဲ့ မျှော်လင့်ချက် လွယ်အိတ်ကလေး

Sunday, April 26, 2015

သံသာလေ ကမ်းတိုင်...

တကယ်တော့ ကျမတို့ ၂ယောက်က နှစ်ကာလများစွာ တယောက်နဲ့တယောက် အဆက်အသွယ် မရှိလဲ နေခဲ့ကြဖူးတယ်။ နှစ်ကာလများစွာ ဆိုတာ ဘယ်လောက်လဲလို့ မေးလာရင်တော့ ဖြေပေးပါ့မယ်။ ခြောက်နှစ်ခွဲကျော် ခုနှစ်နှစ်နီးပါးဆိုတာ ၃၆၅ ရက်နဲ့ မြှောက်လိုက်ရင်။ အဲဒါကို ၂၄ နာရီနဲ့ မြှောက်လိုက်ရင် ... အိုးးး ကိန်းဂဏန်းတွေ တော့ မြင်ရမှာ ပေါ့နော်။

တကယ်တော့ အဲဒီကိန်းဂဏန်းတွေထက် ကျမတို့ ၂ယောက်ရဲ့ ရင်ထဲက သတိရစိတ်တွေ တမ်းတစိတ်တွေကို က အဆပေါင်းများစွာ သာပါတယ်။ လုံးဝ ပြင်ပအဆက်အသွယ် မရှိခဲ့တဲ့ ကျမတို့၂ယောက်ကြားမှာ စိတ်ချင်းဆက်သွယ်မှုက ဘယ်လောက်ထိ တာသွားခဲ့တယ်။ ဘယ်လောက်ထိ ယုံကြည်စိတ်ချရတယ်။ ဘယ်လောက်ထိ အာမခံနိုင်ခဲ့တယ်ဆိုတာကတော့ အတိတ်ရဲ့ ဖြစ်ရပ်တောင်မဟုတ်ပါဘူးလေ။ နှလုံးသွေးရဲ့ သက်သေ သမိုင်းများသာ လို့ပဲ နာမည်တပ်ချင်တော့တာပါ။

Wednesday, March 25, 2015

ပြဇာတ်မဟုတ်တဲ့ ခေတ်ဇာတ်တပုဒ်

အချုပ်ကား သံတိုင်တွေကြားက
ထောင်ပြတဲ့ လက်မလေးတွေ
လက်သုံးချောင်း သင်္ကေတတွေ
လက်သီးဆုပ်တွေ နဲ့ နှုတ်ဆက် လက်ဝါးလေးတွေ
မျက်လုံးတောက်တောက်ကလေးတွေ
လက်ညှိုးချွန်ချွန်လေးတွေ။
သွားဖွေးဖွေးလေးတွေ
မြင်ရတဲ့ တခဏ
အံကြိတ် တက်ခေါက်ရင်း ... ခေတ်ကြီးထဲ ကိုယ်က လဲပြို။

ငါတို့ ဘာလုပ်နိုင်မလဲ
ငါတို့ ဘာလုပ်သင့်လဲ
ငါတို့ ဘာလုပ်ပေးရမလဲ ။
လွန်ခဲ့တဲ့ ၂၅နှစ်
၁၉၉၀ ခုနှစ်တွေကို တရိပ်ရိပ်ပြန်ရောက်သွား။
သူတို့မိဘတွေ နေရာမှာ ကိုယ်တို့မိဘတွေ မြင်ယောင်လို့။
သူတို့စိတ်တွေကို ကိုယ်တို့ ဆက်သွယ်ပေါင်းစည်းနိုင်ခဲ့တာ
အဲဒီလို ထပ်တူပြုမှုတွေကြောင့်ပေါ့။

ဘယ်သူတွေ နားလည်လည် မလည်လည်
နာကျင်ခဲ့ရသူချင်း
ပြိုလဲခဲ့ရသူချင်း
အံကြိတ်ခဲ့ရသူချင်း
လက်မ ထောင်ပြ ကြရသူချင်း
နှလုံးသွေးချင်း ဆက်စပ်ပတ်သက်
ငါတို့ နားလည်ပါတယ် ။
ငါတို့နားလည်နိုင်တယ်။

Sunday, March 8, 2015

ကျောင်းသားစိတ်ဓါတ် စစ်စစ် ဆိုတာ

                                          ဓါတ်ပုံ (ထက်မြတ်လှိုင်)
အခုချိန်ထိ ကျောင်းသားတွေက အစိုးရကို ဘေးကျပ်နံကျပ် ဖြစ်စေတယ် ဆိုပြီး အမြင်စောင်းနေတဲ့ လူတွေကလဲ ရှိသေး။ ပညာတတ်တဲ့။ ဘာပညာတွေ တတ်ခဲ့လဲ မသိပါဘူး။ သဘောတူတယ်ဆိုပြီး ကတိကဝတ်တွေ ဖေါက်ဖျက်နေတဲ့ အာဏာပိုင်ဘက်ကိုတော့ တလုံးမှ မဝေဖန်ရဲပဲနဲ့ လူပေါ်လူဇော် လုပ်ချင်နေကြတယ်။ ကျောင်းသားတွေ မှားတယ်လဲ တိုက်ရိုက်မပြောရဲတော့ တောင်းဆိုတာတွေ မှန်တယ်။ အစက ထောက်ခံပြီး ကျောင်းသားတွေက ဘေးကျပ်နံကျပ်လုပ်နေလို့ မထောက်ခံတော့သလိုလို ။ လူလည်လုပ်နေကြတာ။ အဓိကကတော့ အာဏာရှင်ကို ကြောက်နေရဆဲ။ ရုန်းမထွက်နိုင်သေးတဲ့ သူတို့ရဲ့ မူလ အငုံ့စိတ်ကြောင့် အမှန်ကို မဖွေရှာရဲတာ။ ရန် ငါ မပြတ်ကြတာ။ တဖက်က အခွင့်အရေးလေး မျှော်လင့်နေကြတာ။ သူတို့ မလုပ်နိုင်တာတွေ လုပ်နေတဲ့ ကျောင်းသားတွေကို မနာလို တိုရှည်နဲ့ ကဲ့ရဲ့ကြတာ၊ ရှုံးနိမ့်စေချင်ကြတာ။

ကျောင်းသားသမိုင်းတလျှောက် နိုင်မယ် ထင်မှ တိုက်တဲ့လူစားတွေ မဟုတ်ဘူး ဆိုတာတော့ သိစေချင်ပါတယ်။ မတရားမှု မှန်သမျှကို တော်လှန်သွားမှာ ကျောင်းသားစိတ်ဓါတ်စစ်စစ်တွေပါ။
 (လက်ပံတန်းမြို့မှာ မတ်လ ၃ ရက်နေ့ကစတင်ပြီး ထိုင်သပိတ်ဆင်နွဲနေတဲ့ ဒီမိုကရေစီပညာရေးပင်မသပိတ်စစ်ကြောင်းကို ဂုဏ်ပြုလျှက်)
ချစ်ခင်စွာဖြင့်
ခင်မင်းဇော်

ကျောင်းသားတွေကို နားလည်ပါ။

          (အုတ်ဖိုမှ မင်းလှသို့ ပင်မ စစ်ကြောင်းချီတက်စဉ်) (၁၆၊ဖေဖေါ်ဝါရီ၊၂၀၁၅)

ကျောင်းသားလေးတွေရဲ့ လှုပ်ရှားမှုကို စောနေသေးတယ် အချိန်မကျသေးဘူး ဆိုတဲ့အတွေးနဲ့ ၂၀၁၅မှာ အမေစု နိုင်ရင် ဒါတွေက လွယ်သွားမှာ ။ ဒါကြောင့် သပိတ်ကို ရပ်ဖို့ ပြောနေတဲ့ အပြောတွေအတွက် တခုလေးပဲ မေးချင်ပါတယ်။

အခု အကြမ်းဖက်မှုတွေကို ဘယ်သူက စလုပ်တာပါလဲ။ အဲဒီလူတွေကိုလဲ ကန့်ကွက်ရှုတ်ချပေးပါ။

လွှတ်တော်ထဲမှာ အဲဒီဥပဒေကို ရတဲ့နေရာက ကန့်ကွက်ဖို့ လွှတ်တော်ထဲ ရောက်နေတဲ့ ဘယ်အမတ်က ဦးဆောင် ခဲ့ပါသလဲ။

လွှတ်တော်ထဲမှာ ကန့်ကွက်မရလို့ ဆိုပြီး ၄၃၆ လိုပဲ ကန့်ကွတ်တဲ့ လွှတ်တော်ပြင်ပ လှုပ်ရှားမှုတွေကို ဘယ်ပါတီ ဘယ်အမတ်က ကလေးတွေအတွက် ဆိုပြီး ဦးဆောင် လုပ်ခဲ့ပါသလဲ။

 ဒီတော့ ဒီကျောင်းသားလေးတွေဟာ သူတို့ရှေ့မှာ ဘယ်သူမှမရှိဘူး သိခဲ့တဲ့အတွက်၊ ဥပဒေကြမ်း အတည်ပြုတာနဲ့ ဒီလှုပ်ရှားမှုကို ဆန့်ကျင်ရဖို့ တာဝန် သူတို့ဆီကျရောက်သွားတာပါ။

ဘယ်သူကမှ ဒီလောက် ပင်ပန်းဆင်းရဲ အခန့်မသင့်ရင်ထောင်ကျ အသက်ပါသေနိုင်တဲ့ အလုပ်မျိုးကို မလုပ်ချင်ပါဘူး။ ဘယ်ပါတီ ဘယ်အဖွဲ့ကမှ ဒါတွေ ဦးဆောင်မလုပ်ခဲ့လို့ ကိုယ့်အသိနဲ့ ကိုယ် လုပ်နေကြတာပါ။

 ဒီတော့ စောနေသေးတယ် အချိန်မကျသေးဘူး ဆိုတဲ့ လူတွေ အာမခံချက် ပေးနိုင်မလား ဆိုတာ တခုမေးချင်ပါတယ်။ ၂၀၁၅မှာ ဒေါ်စု ပါတီ တကယ်ပဲ ရာနှုန်းပြည့် နေရာပြည့် မဲနိုင် မလား၊ မူကြမ်းတင်တုန်းက ဘယ်သူတွေ အဲဒီမူကြမ်းကို ကန့်ကွက်ခဲ့ကြသလဲ ဆိုတဲ့အချက်ကိုပါ ပြန်လေ့လာလိုက်ပါ။ ပြီးမှ ရာနှုန်းပြည့်မယ်နိုင်မယ်ဆိုရင်တောင် သူတို့ မကန့်ကွက်ခဲ့တဲ့ ဥပဒေကို ပြင်ချင်ပါ့ဦးမလား ဆိုတဲ့ သံသယအတွက် ကလေးတွေကို နားလည်ပေးလိုက်ကြပါ။

(၂၀ရက်နေ့ ဇန်န၀ါရီလ ၂၀၁၅ ကနေ စတင်လမ်းလျှောက်နေကြတဲ့ မန္တလေး ရန်ကုန် ဒီမိုကရေစီပညာရေးသပိတ် ပင်မစစ်ကြောင်းအား ဂုဏ်ပြုလျှက်)
ချစ်ခင်စွာဖြင့်
ခင်မင်းဇော်

Saturday, February 7, 2015

၂၀၁၅ မျိုးဆက်သစ်တို့ရဲ့ နိဒါန်း ခေတ်ဝန်ကို ထမ်း


လမ်းလျှောက်နေတဲ့ ကျောင်းသားတွေကို လမ်းလျှောက်တာ မှားတယ်။ အကြမ်းဖက် ခံရလိမ့်မယ် စသဖြင့် သနားကြင်နာတတ်ကြသူတွေ ကို တခုပဲ ပြောပြချင်ပါတယ်။ အကြမ်းဖက်မယ်ဆိုရင် အစိုးရက ဖက်မှာပါ။ လမ်းလျှောက်နေသူတွေမှာ အပ်တိုတချောင်းမပါ ပါဘူး။ ဒီတော့ ငြိမ်းချမ်းစွာ လမ်းလျှောက် ချီတက်နေတဲ့ သပိတ်မှောက်ကျောင်းသားတွေကို သူများအကွက်ထဲ ၀င်တယ်တို့၊ သေကြေကြမှာ စိုးရိမ်တယ်တို့ဆိုရင် အကြမ်းဖက်မဖြေရှင်းဖို့ အစိုးရကို ကန့်ကွက်ပါ။ ရှုတ်ချပါ။ သူများအကွက်ထဲ ၀င်တယ်ဆိုရင် မ၀င်အောင် ဝန်းရံကြပါ။ များများ စာနာသနားလေ များများ ၀န်းရံဖို့ လိုလေပါပဲ။

သူတို့တွေဟာ ရက်ပေါင်း ၆၀ပေးပြီး ထိုင်စောင့်ခဲ့ပြီးပါပြီ။ ခုလို လမ်းလျှောက်နေတဲ့ ခြေလှမ်းတိုင်းမှာ ယုံကြည်ချက်တွေ ဆုံးဖြတ်ချက်တွေနဲ့ ပိုင်းဖြတ်ပြီးပါပြီ။ သူတို့ခြေလှမ်းတိုင်းမှာ ဂုဏ်သိက္ခာတွေ ရှိပါတယ်။ သူတို့ကို အထင်မသေးကြစေချင်ပါဘူး။ ကျမတို့ လဲ ၈၈ တုန်းက ဒီအရွယ်ပဲ လမ်းပေါ်ထွက်ခဲ့ကြတာမှာ ဘယ်သူတွေက သွေးထိုးလှုံ့ဆော်ခဲ့လို့လဲ၊ ဘယ်သူတွေက အကွက်တွေ ဖန်ခဲ့လို့လဲ။ သူတို့ခေတ်တာဝန်ကို သူတို့ ထမ်းနေကြတာလို့ပဲ ကျမတော့ မြင်ပါတယ်။ သူတို့ကို လမ်းလျှောက်တာကနေ ရပ်နားခိုင်းတာဟာ လည်စင်းခံခိုင်းတာနဲ့ တူတူပါပဲ။

ဖွဲ့စည်းပုံအခြေခံဥပဒေ ပြင်ဆင်ရေးက အဓိကမို့ အမျိုးသားပညာရေး ဥပဒေကို မကန့်ကွက်ရဘူးဆိုတာကိုလဲ လက်မခံပါဘူး။ အခုကလေးတွေဟာ ဖွဲ့စည်းပုံအခြေခံဥပဒေကန့်ကွက်ဖို့ လက်မှတ်ကောက်ခံခဲ့တုန်းကလဲ ရှေ့ဆုံးက ပါဝင်ခဲ့သူတွေပါ။ သူတို့နဲ့ သက်ဆိုင်တဲ့ ပညာရေးဥပဒေကျမှ နေပါဦးဆိုတာက မတရားပါဘူး။ သူတို့အလုပ် သူတို့လုပ်နေတာကို မကူညီချင်ရင်တောင် သေးသိမ်စေမယ့် စကားမျိုးတွေ မပြောစေချင်ပါဘူး။ သူတို့ မသေစေချင်ရင် သူတို့ အလှည့်မခံစေချင်ရင် သူတို့ကို ပိုမို ဝန်းရံ ကြပါ။ မျိုးဆက်သစ်တွေရဲ့ နိဒါန်းကို မျိုးဆက်ဟောင်းတွေက အားကြိုးမာန်တက် အားဖြည့်စေချင်ပါတယ်

ခုဆိုရင် ၂၀၁၅ မျိုးဆက်သစ်တွေရဲ့ ကြိုးစားအားထုတ်မှုနဲ့ ခေတ်ဝန်ကို ထမ်းနေမှု ကို ထင်ထင်ရှားရှားမြင်နေရပါပြီ။ ဆွေးနွေးပွဲတွေဆီကို ခေါ်ဆောင်သွားမယ့် ခြေလှမ်းတွေမို့ ဆက်လျှောက်ကြပါ ကလေးတို့။ ဆက်လျှောက်ကြပါ ကျောင်းသားတို့။

ချစ်ခင်စွာဖြင့်
ခင်မင်းဇော်
(ဧရာဝတီတိုင်း ဗကသ၊ ၁၉၈၈)